ភ្នំពេញ៖ មជ្ឈមណ្ឌលត្រួតពិនិត្យនិងបង្ការជំងឺឆ្លង CDC របស់អាមេរិក បានសម្រេចកែប្រែលក្ខខណ្ឌសម្រាប់អ្នកដំណើរជាជនបរទេស ឬជនអន្តោប្រវេសន៍ចូលប្រទេសខ្លួនតាមយន្តហោះទាំងអស់ ដែលមានអាយុលើសពី២ឆ្នាំ ត្រូវមានឯកសារបញ្ជាក់ការចាក់វ៉ាក់សាំងពេញលេញ និងមានលទ្ធផលតេស្តកូវីដ-១៩អវិជ្ជមាន ធ្វើមិនលើសពី១ថ្ងៃមុនពេលចេញដំណើរឬឯកសារបញ្ជាក់ការជាសះស្បើយពីកូវីដ-១៩។ នេះបើតាមការឱ្យដឹងពីស្ថានទូតនៃព្រះរាជាណាចក្រកម្ពុជាប្រចាំសហរដ្ឋអាមរិក។
សម្រាប់ពលរដ្ឋអាមេរិកទោះចាក់វ៉ាក់សាំងការពារបានពេញលេញ ឬមិនទាន់ក្ដី មជ្ឈមណ្ឌលត្រួតពិនិត្យនិងបង្ការជំងឺឆ្លងនៅតែតម្រូវឱ្យធ្វើតេស្តកូវីដ-១៩អវិជ្ជមាន ធ្វើមិនលើសពី១ថ្ងៃមុនពេលចេញដំណើរ ឬឯកសារបញ្ជាក់ការជាសះស្បើយពីកូវីដ-១៩ផងដែរ។
ការវិធានការថ្មីរបស់សហរដ្ឋអាមេរិកនាពេលនេះនឹងត្រូវចាប់អនុវត្តពីថ្ងៃទី០៦ ខែធ្នូ ឆ្នាំ២០២១តទៅ៕
